About Ilaaha

Aaj ke is purfitan aur khatarnaak daur me har imaan wale ke liye apne imaan ka mehfuz rakhna mushkil sa hogaya hai. Ahl-e-islam duniyaparasti me mubtila ho kar aur firqaparasti ki aag me jal kar shaitaan ki khushi ka saamaan ban rahe hain. Isi par bas nahi balke dusron ko apni tanqeed ka nishaana banaa kar apne gunaaho ka zakhira kar rahe hain. Is tarah aaj ummat e muhammadiya (s.a.w.) mukhtalif andaaz wa anwaa se apne RAB se bichadh gayi hai. Aur shaitaan apni qaum ke hamraah is baat par khush hai ke unhone Aadam (a.s.) ki aulaad ke ek bade hisse ko jahannum ka misdaaq bana diya hai.

HAMARI MEHNAT AUR USKE MAQAASID


Hamari mehnat ka maqsad ALLAH (s.w.t.) ke bichdhe huwe bandon ko usse milaana hai. Ummat ke mukhtalif shobon (Doctors, Teachers, Students, Aalims etc.) me unki noiyat ke etebaar se mehnat karke unko unke RAB ka banaane ki fikr ki jaati hai jo apne ek naafarmaan bande ko bhi 70 maaon (Mothers) se zyada chahta hai. Ham bandon ko uss RAB ka banana chahte hain jo apne bandon ka aisi shiddat se intezaar karta hai ke dusra koyi itna shadeed intezaar nahi karta.
Lihaza, Maqsood apne Nabi (s.a.w.) ki ummat ko imaani, ilmi, amali, akhlaaqi aur roohaani etebaar se uss sateh par laane ki koshish karna hai jis sateh par hamare Nabi (s.a.w.) hamen chodh kar gaye the.
ALLAH TAALA ke fazl wa karam se ye mehnat mukhtalif juhood aur musalsal koshishon ke baad aaj Hind se badh kar saare aalam me phel gayi hai. Ye isliye bhi mumkin ho paya ke hamari mehnat duniya ke munaafe aur shohrat wagera se bilkul paak; Khaalis ALLAH ki razaa wa khushnudi ki khaatir hai. ALLAH TAALA hamen in maqaasid me apni chahat ke mutaabiq mustaqeem farmaye aur hamen apne sachche aur aashiq bandon me shaamil farmayen.

ilaaha.com KA MAQSAD AUR ZARURAT


Bandon ko RAB se milaane aur unke dil me muhabbat-e-ilaahi wa ishq-e-rasool (s.a.w.) ko bedaar karne ki garz se hamne daur-e-haazir ke mukhtalif zaraaye ablaag ka istemaal kiya. Aur apni har mumkin koshish ki ke kisi tarah bandon ka unke RAB se rishta e abdiyat aur RAB ka uske bandon se rishta e ulfat salaamat rahe. Aur unke dil me ALLAH uske Nabi (s.a.w.) ki muhabbat ka ehsaas jaag jaye. Lihaza kabhi Whatsapp messenger, kabhi Youtube aur deegar mukhtalif zaraaye ablaag ke zariye zyada se zyada ummat ko ALLAH ka banane ki koshish ki gayi aur jab aahistah aahistah in mehnaton ka range duniya ke aksar khitton me phel gaya aur aalami sateh par followers badhne lage to zarurat mehsus huwi ke website ki shakal me ek platform create karke saari mehnaton ko ispar yakta aur jama kar diya jaye, taake badhte followers aur unki deeni tishnagi ko sambhala aur pura kiya jaa sake. Isi baat aur soch ke natije me ilaaha.com ka qayaam amal me aaya hai.

WEBSITE KA CHEHRA


Ye website har us bande ke liye inshallah mufeed aur nafabakhsh hai jo apne RAB ka sachcha banda banne ka azm-e-musammam rakhta hai aur apne Nabi (s.a.w.) ka haqeeqat me ummati banna chahta hai. Ye website raah-e-ishq wa muhabbat ke har musaafir ke liye mashal-e-raah ki maanind hai. ALLAH TAALA is website ko apne maqaasid aur manaazil me kaamiyaab farmaye aur aaj ke pur aashob daur me ummat ke liye baais-e-rehmat banaye. (Aameen)